أدب رحلات.. هوب أون هوب أوف Hop On Hop Off

بقلم رباب فؤاد

لما وصلنا سان فرانسيسكو كان يوم السبت مساء.. فرق توقيت 10 ساعات عن القاهرة.. و3 ساعات عن واشنطن اللي لسه طالعين منها.. يعني ملحقناش نخلص من الJet lag الاولانية عشان نخبط في التانية.

والJet lag في عجالة هي عملية لخبطة فسيولوجية بتحصل لما تسافر مكان بينه وبين مكان اقامتك فرق توقيت كبير.. زي مع الولايات المتحدة كدا لو سافرت غربا او الصين واليابان لو سافرت شرقا
الرحلة طبعا من اقصى شرق امريكا لأقصى غربها ومش بس كدا.. دا شمال شرق لجنوب غرب.. يعني واخدين امريكا بالورب.. فطبيعي تاخد 8 ساعات طيران متواصل… والطيارة كانت فاضية فكل واحد فينا اخد 3 كراسي لحسابه.. ينام بقى يبرطع هو حر
نيجي للمهم.. موضوع العنوان الغريب اللي فوق
في الفندق جات مندوبة من شركة سياحة داخلية وكلمتنا واحنا في الريسبشن عن فكرة الرحلة..
اوتوبيس دورين… الأرضي مغطى طبعا والتاني مكشوف منك للسما.. بتدفع مبلغ محترم(42 دولار) وتطلع تاخد الباص من اي محطة على طريق سيره.. توري السواق التذكرة فيديك كيس فيه سماعات شخصية جديدة، وتطلع تركب فوق اكيد.. تركب السماعة في ظهر الكرسي اللي قدامك وتسمع المرشد أو المرشدة اللي معاك بيقول ايه في وصف الاماكن اللي بتمروا عليها، ولو المكان ليه حادثة تاريخية معروفة او شيء بيحكيها طبعا
اهم شيء في الاوتوبيس دا متقفش غير في المحطات، لأن اشارات المرور هناك رغم ارتفاعها بتبقى فوق دماغك وانت قاعد.. فمع سرعة الاوتوبيس وانت واقف.. تخيل الاشارة ممكن تعمل في وشك ايه… دا لو مطيرتكش من عالباص اصلا.
ومش هحكي عن صديقنا اللي كان مجنن المرشدة وهو عمال يتنقل من الكراسي اليمين للشمال وهي تزعق وتقوله اقعد مكانك يا اما هنزلك من الباص
طيب.. ييجي حد يقول فين الابهار؟ اتوبيس بدورين بيلف المدينة.. مهو عندنا في اسكندرية ب15 ج وزي الفل.. ادفع انا 42 دولار (حوالي 800 ج وقتها) ليه؟؟
اقولك ليه…
التذكرة دي مدتها يوم كامل (وفيه منها مدته 3 ايام) بتركب اول باص وتقعد.. اثناء الرحلة عجبك مكان.. سيتي هول (مجلس المدينة) او يونيون سكوير .. انزل اتصور وخد لفتك في المكان براحتك خالص.. عاوز تدخل كافيه او مطعم او حتى مول مفيش اي مشكلة.. المهم تذكرتك في جيبك.. خلصت اللي نزلت عشانه؟ اطلع مكان ما الباص نزلك واستنى اللي بعده.. وانت بتركب وري السواق تذكرتك واطلع اقعد تاني وكمل باقي الجولة.. ليك عدد لا نهائي من الوقفات وتطلع تركب اللي بعده عادي جدا مادامت تذكرتك معاك، وطبعا كمصري هتاخد في كل مرة سماعة جديدة.
بالتالي لو حسبتها هتلاقي انك اتفسحت وزرت اماكن كتير نظير تذكرة واحدة.. فانت اكيد كسبان.
غير انك ممكن تعيد الجولة تاني وتالت لو وقتك يسمح اثناء اليوم.
يعني احنا اخدنا اول رحلة الساعة 12 ونص.. نزلنا عند جسر جولدن جيت او البوابة الذهبية، ونزلنا في الموقف النهائي للباص ركبنا اللي طالع من اول الخط، ودا كملنا معاه نص الرحلة الباقي ونزلنا عند الفندق.. كانت حوالي الساعة 4.. صلينا ونزلنا تاني اخدنا الباص اللي بعده عشان نشوف سان فرانسيسكو بالليل، وكانت الجولة فعلا ممتعة اكتر من النهار، خصوصا على جولدن جيت بريدج اللي كان متألق تحت الأضواء… ومع ذلك حذرونا ننزل من الباص عشان محدش يثبتنا تحت وياخد اللي معانا (اه والله حذرونا من النزول عالجزيرة بالليل لأن الاضاءة عليها مش بنفس قوة الجسر وفيه بعض السرسجية الامريكان بيستغلوا الضلمة دي في تثبيت اي سائح ينزل، فالحمد لله يعني عدت على خير)
وللحديث بقية عن سان فرانسيسكو وجولدن جيت بريدج.

Leave A Reply

Your email address will not be published.